నవంబర్ 13: 'స్కేరీ పిక్చర్' టైటిల్ గ్లింప్స్ విడుదల

దగ్గుబాటి రానా 'స్కేరీ పిక్చర్' పేరుతో కొత్త హారర్ సినిమాను ప్రకటించారు. ఈ చిత్రం అధికారిక టైటిల్ గ్లింప్స్‌ను మేకర్స్ నవంబర్ 13న విడుదల చేశారు.

ఇందులో కంగనా రనౌత్ ప్రధాన పాత్రలో నటిస్తున్నారు. తెలుగు దర్శకుడు రవిబాబు ఈ సినిమాను తెరకెక్కిస్తున్నారు. హిందీ సినిమాలో ఆయనకు డైరెక్టర్‌గా ఇదే తొలి చిత్రం.

డి. సురేష్ బాబు, రవిబాబు కలిసి సురేష్ ప్రొడక్షన్స్, ఫ్లయింగ్ ఫ్రాగ్స్ ప్రొడక్షన్ బ్యానర్లపై సంయుక్తంగా ఈ చిత్రాన్ని నిర్మిస్తున్నారు.

ఈ సినిమాతో పాటు రానా మరో లక్ష్యాన్ని కూడా వెల్లడించారు. సురేష్ ప్రొడక్షన్స్, స్పిరిట్ మీడియా ద్వారా హారర్ సినిమాలు తీసే దర్శకుల కోసం ప్రత్యేక వేదికను నిర్మించాలని ఆయన భావిస్తున్నారు. ఆ ప్రయాణం 'స్కేరీ పిక్చర్'తోనే మొదలవుతోంది.

“

స్కేరీ పిక్చర్‌తో ప్రారంభించి, ఈ జానర్‌ని ఇష్టపడే దర్శకులకు నిరంతరం నిర్మాణ మద్దతు, విడుదల అవకాశాలను అందించడమే మా లక్ష్యం. భారతదేశం ప్రతి జానర్‌లోనూ వైవిధ్యమైనది, హారర్ కూడా అందుకు మినహాయింపు కాదు. ప్రతి ప్రాంతానికి దాని స్వంత భయాలు, కథలు, వాటిని చెప్పే మార్గాలు ఉంటాయి. సైకలాజికల్, క్రీచర్, హారర్-కామెడీ, సోషల్ హారర్ లేదా దర్శకులు తీసుకొచ్చే ఎలాంటి కొత్త కథలకైనా మేము సిద్ధంగా ఉన్నాం. — దగ్గుబాటి రానా

రవిబాబుకు ఈ జానర్ కొత్తేమీ కాదు. ఆయన గతంలో తెలుగులో 'అనసూయ', 'అవును', 'ఆవిరి' వంటి హారర్ సినిమాలు తీశారు. ఇప్పుడు అదే జానర్‌తో హిందీ ప్రేక్షకుల ముందుకు వస్తున్నారు.

'స్కేరీ పిక్చర్'ను 2027లో థియేటర్లలో రిలీజ్ చేయాలని మేకర్స్ ప్లాన్ చేస్తున్నారు.